Isa, daywa, tatlo
Si Tatay mong kalbo;
Sumakay sa barko,
Naeunod pag-abot sa Baryong Bagto.
***
Nag-uli ako halin sa tanuman
Ay nagutom rang tiyan;
Pag-abot sa baeay namon,
Owa it nakaon, nagkatueog lang dayon.
***
Nag-agto ako sa Lezo
Aba owa gid it ga-inato kimo
Ro mga tawo hay puro may trabaho
Dahil abu nga kompromiso
***
Nag-adto ako iya sa Miami
Halin sa banwang tinubuan
Mga taean-awon iya puro manami
Nga indi gid nimo malipatan
***
Naila kunta ako manuba
Daea ako it sumsuman
Ugaling madaeom ro baha
Owa madayon ro inuman
Goling, goling, goling
Ayaw gid anay it adwing
Hueata it may gakiriring
Basi ka mapuling
***
Nagsakay ako sa paki nga kabayo,
Halipatan ko rang kaeo;
Pag-abot ko sa Makato,
Ang ueo nagtangu-tango.
***
Aba si Lola Concha,magueang eon
Pero gwapa gihapon;
Pero bukon pa't molianon,
Sige pa ra binasa bisan ra mata madueom eon.
***
Nag-adto ako sa Dinapa,
Bitbit ko sangka kaldero nga eangkuga;
Gulping kumalakala ro mga paka ,
Aba nakibot ako hasta ro eangkuga nauea.
***
Abaw malisod gid ro pobreng pangabuhi,
Owa't kahamtangan ro imong pagkabutang;
Adlaw gabii nagakagha,
Kon paalin sanda mabuhi.
***
Nag-adto ako sa Tayhawan,
Idto sa baeay ni Tatay Julian;
Aba abu ra siniad-siniad nga kawayan,
Ginabaligya gali sa tindahan.
***
Ro mga bueak sa katapatagan,
Mahumot ag maamyom;
Kon agahon nagabukadkad,
Kon tueokon mo nagahiyom-hiyom.
***
Ay abaw si lnday sa ka puea-puea,
Daw bueak it katueanga;
Sadyaan man ra saya,
Nagasagyad sa karsada.
***
Mali mare sa Malinao ,
Mausoy kita it gutaw;
Agud may aton nga tueaon,
Ag eamhayan it bolinao
***
Nagbakasyon kami sa Hong Kong
Daea ko ro akon nga pamilya;
Pag-abot namon idto abaw ka abu-abu nga mga turista
Halin pa kon siin-siin nga banwa
***
Mayad ayad gid konta
Kon makapamasyar sa ibang lugar,
Abu ring makita, abu nga experiencia,
Ugaling ro problema kon owa ka’t kwarta sa buesa.
***
Ako si Jose Rizal –
Gatungtong sa bato –
Ueanon, silakon –
Si Rizal man gihapon.-
***
Mayad gid ro mga unga
Kon may anda nga tinun-an,
Malipay ro mga ginikanan
Sa pangabuhi nanda nga mayad-ayad nga pamatasan
***
Ro akon nga tatay hay mananggiti,
Pas-an na permi ro kawit ag kueagi;
Agahon ag hapon nagapananggot,
Ag idto magpinatik sa anang kueagi.
***
Ro amon nga pangabuhi,
Hay isang kahig isang tuka;
Kon indi magkahig,
Owa kaman it matuka.
***
Masadya gid anay kato ro pag-inuman,
Sa hungot ginatigis ro tuba;
Segi ro estorya, segi man ro inom
Hasta sanda magkaeahilong.
****
A retired teacher, Mrs. Alfresa Reyes is from Sta. Cruz, Lezo, Aklan. She resided in America before she passed away in August 2010.
