Ni Aaron Shepard
Gin-Inakeanon ni Melchor F. Cichon
September 18, 2010
““Hilary!” hambae ka nanay, “pwede ka makabulig?”
“Ginasamitan ko” sabat ni Hilary.
Nagagto si Hilary sa anang kwarto ag pinusdak na ro pwertahan. Naghampang imaw ku anang mga hampangan.
“Tabang! Hilary! Tabang!” singgit ka anang nanay.
“ Una eon,” sabat na. Daywang maeaing mga eaeaki ro naghakwat sa anang nanay! Gin-eagas sanda ni Hilary sa karsada.
“Andam!” hanbae ku isaea. “Gina-eagas kita it eaki.”
“Mahalin eagi kita riya,” sabat ku isaea. Tinik-eod nanda ro nanay ni Hilary sa sueod it kotse ag umarangkada.
“Tabang! Hilary! Tabang!”
Nagsakay si Hilary sa eain nga saeakyan ag gin-eagas sanda. Nagpundo sanda sa airport ag dumiritso sa eroplano. Sa likod eang nanda si Hilary.
“Ihueog ninyo rang nanay,” suminggit si Hilary. “Eagi-eagi!”
Hinueog it mga eaki ro nanay ni Hilary ag dumaeagan. Ugaling may higanteng pispis nga dumagit. Ag eumupad.
“Tabang! Hilary! Tabang!”
Nagbalik si Hilary sa eroplano ag nag-eupad nga nagatiyog-tiyog. Tumugpa ra nanay sa ibabaw it eroplano.
“Buyot,” singgit ni Hilary. Galing inapok ra nanay it hangin.
“Tabang! Hilary! Tabang!”
Eumokso si Hilary sa eroplano. Bumagsak sanda sa suba. “Tsok!” Ugaling ro busay hay sa unahan eang.
“Tabang! Hilary! Tabang!”
Hinab-eot ni Hilary ra nanay ag eumangoy paeapit sa pangpang. Galing bumotwa ro higanteng magkae. Nagbuka ra baba.
“Tabang! Hilary! Tabang!” Eeeeek!
Tinueon sanda it sawa. Sa pagpanaog nanda, gin-itik ni HiIary ro tutonlan it sawa. Umubo ro sawa ag ginsuka sanda. Nag-agi sanda sa banwa. Ag tumugpa sanda sa andang baeay.
“Hilary!” hambae ka nanay. “ Mabahoe ka gid nga BULIG!”
