Kon Paano Nag-umpisa Sa Paghambae Ro Mga Filipino
Ni Melchor F. Cichon
June 20, 2011
Pagbuka ku botong kon siin si Malakas ag si Maganda nagtuhaw, mahipos ro kalibutan. Owa’t eabot sa mga huni it kapispisan, ag mga tunog ku mga ayam, kuring, kanding, anwang, baka, kabayo at iba pa nga mga kasapatan, owa gid sanda’t mabatian nga tunog sa andang palibot. Kon may gusto nga hambaeon si Malakas kay Maganda, ginakuhit nana imaw, o kon magsinyas. Kon gusto nana nga magpaeapit si Maganda kana hay ginapaypayan eang nana. Ro mabahoe nga problema ni Malakas ag ni Maganda hay kon matunod eon ro adlaw. Mayad eang kon ugsad ay mahayag ro anda nga palibot.
Sangka agahon nga magaeum ro kaeagitan, nag-agto si Malakas sa Maeara, sangka suba-suba sa Lezo, Aklan. Naglingkod imaw sa sangka tuod nga maeapit sa tubi. Ginpamatyagan nana ro matin-aw ag malinong nga tubi it suba. Ag gulpi nga may nagpuka. Owa magbuhay hay may nagpuka pa gid. Ginsunod nana ro tunog it pagpuka—tsok! Gintandaan nana ra. Sa piniino na hay isugid nana ra sa anang asawa nga si Maganda.
Pagtindog na hay may naghuni nga paka—kla, kla, kla. Mangan-angan hay may nabatian pa imaw nga huni it paka—kla, kala, kla. Ginsunod nana ra sa anang paino-ino. Sa isip na, siguro naga-istoryahanay ro daywang paka. Siguro mana hay baye ag eake rato sanda. Mayad pa mana ro paka naga-estoryahanay, buko’t paris kamon ni Maganda nga gakalablitan o nagasinyas eang.
Pag-abot ni Malakas sa andang eangbon, nagsinggit si Malakas kay Maganda: Kla! Kla!
Nagsabat si Maganda: Kla! Kla!
Rato ro umpisa ku paghambae it mga tawo sa Pilipinas.
