Cirilo Castillon
A native of Numancia, Mr. Castillon is a philanthropist and a poet.
Mga Guyum
(02.10.04)
Ako ha katoeog sa among lamesa,
Sa pag hinoeat sa akong Ina
Halin sa pag libod suman nga balinka.
Sa akong pag mokeat ko akong mata,
Akon nga ha kita mga guyum naga parada;
Bitbit mga moh-moh nga ma bahoe pa kanda..
Gin pitik ko ro isaea, inapok ra dinaea;
Nag taeap-ea-ag sanda, andang ginaosoy
Nadoea nga dinaea.
Owa't nag dohong, owa ma't hangawa,
Siging tinikang paadto rikato, paadto rikara;
Hasta nga makita ro gina osoy nanda.
Sanda nga maisot, pero ga inobra;
Ako nga mabahoe,
Gina pabay-an rong Ina.
Ako hay naeo-oy,
Gin boligan ko pa sanda,
Sa pag osoy it pagka-on ko andang pamilya.
Pag abot ni Nanay, may eoha rang mata;
Pag eahay kang ayam, daeagan kami kana.
Inay, makon, hin-aga, suman natong baligya,
Ako ro ma daea.
Kangga Ni Tatay Goloy
(02.11.04)
Owa't lubak, owa't humbak,
Mingko gaduylon eang;
Masueondon nga anwang,
Ro nagadaea katon.
Sa atong pagsakay,
Mag estoryahan kita;
Pwede mang magtula,
Pwede mang magkanta.
Sadya gid man kunta kon may antigo maggitara;
Ta-o baea si "Pango" kun kaantiguhan kara?
Sa atong pagsakay,
Sa paglibot it Akean,
Aton nga makita, maeapad nga kaeanasan;
Aton mang maagyan mga kabutongan, kanipa-an, kasagingan,
Ag maliway nga kanyogan.
Sadyang magsinakay,
Kapin kon may ginakuyam-kuyam:
Mangga, ibos, suman, ag bukayo nga palaman,
Tam-o, bandi, kumbo, ag saging nga bunguean,
Indian manggo, ag ginamos o dayok man nga saw-sawan.
Kon kita abutan it ilabas sa daean,
May baeon si Maearang humay ag tinueang pinayukan;
Si Toryo may daea mang inihaw nga eogsok,
Inasae nga bantaea-an, sinaing nga tamban,
Ag sinampi nga poeangan.
Sakay kamo, sakay, sa kangga nga especial;
Abong estoryahan bangod sa atong paeangabohi-an;
Mga kabataan, aton nga buligan,
Agod mangin mayad
Nga pumueuyo it atong Akean!
Si Maeara
(02.11.04)
Pobre man giod intawon, sinana't Bohol-anon,
Kon imo nga makita ro onga nga si Maeara;
Waeo nga mag manghod, taga-Lezo sanda,
Gin sika-sika ka manggaranong Tiyo ag Tiya.
Kun sanda ma-miesta sa banwang Numancia,
Igto gasaka sa Tiyo ag Tiya;
Kon anang tabingon ro andang hampangan,
Ginamoeay imaw, ginamudlatan.
Kon sanda pakan-on, owa sa lamesa;
Indi ig pa iba sa ibang bisita;
Igto eang sa binet, tumpukon don sanda,
Ag igto pakan-on ku mga tira-tira.
Sa anang kaisot, ag andang kalisod,
Nagpaningoha sanda ku anang mga igmanghod;
Nagtoon it mayad, nagpursigi, ag naghugod,
Hasta nag-asenso sa bulig ku anang mga igmanghod.
Bulahan nga unga, owa gapabaya;
Mayad nga huwaran ku mga kabataan.
Ro ungang pobre, indi kapintasan,
