Search This Blog

Saturday, April 14, 2007

A Poem by Nady M. Meren


NADY M. MEREN


KINAMANG


nagakamang do kaeayo

kanami tan-awon sa kagab-ihon

(ay ro ano indi hilmon)

sa akong pagbugtaw,

ro adlaw hay matsa nagangisi:

dahil baea naila imaw magtan-aw

ku mga alipaeok

nga nagaduyan-duyan sa kahanginan

ukon

dahil ginaintrimis nana

ro kahapon eang hay nagadoeueopa

nga mga narra

nga matsa indi masiog

dahil sa kaeangbu ku andang mga dahon

ag kaabu ku andang mga bunga

pero makaron hay matsa mga estatwa

nga gin-ubahan

sa nagangito-ngito nga kaitom.

madangga.

ginahilasan ako.

***

BAHAG AG TANGGA

gusto ko nga magbahag eang

pareho kay Lapu-Lapu

pero nahuya ako

hay amo ro pagtan-aw

ku mga taga-nakatungdan

sa mga nakabahag

pero akong nangawahan

ham-at kung magsusok

si Inday it

saya

ag

kimuna

nagahaeakhak man sanda

tao baea kon hasayran nanda

nga ro mga nakasaya ag nakakimuna

hay owa it panti ag bra

ukon dahil naila eang sanda

nga magtan-aw kay Inday nga

magtangga

ah

makaron

hasayran ko eon

do gusto man lang gali nanda

nga si Inday hay mag-

uba.