JOEFFREY L. RICAFUENTE
KABAYLO
Nong Peter, kabati ka baea nga ro tawo
mangin upas it saging?
Si Manong, kat owa pa't a ako gahugas
it pinggan iya kinyo, hambae ni Nanay,mangin upas it saging.
Mahilig abi kuno magpupanihoe sa gabii
Hay! Hakindatan kuno imaw
it daeaga nga owa it kanae-kanae.
Ano abi, matig-a gid it...
nagpilo ra tuhod
ag matsa impiyerno eon kuno imaw sa init.
Kaeuoy man si Manong, owa nagbuhay.
Nabasa ro tuwalya ni Nanay
Sa kaugot-ugot ni Tatay,
einapog na sa bintana ni Manong, ag
tumugpa kuno sa upas--buhi!
Buhi kuno si Manong!
Hay, mapati ka eon?
Porke't owa kamo iya gasakay sa anwang
paagtu sa eskuylahan.
Ginasugid ko kimo
nga sa imo nga pagpuepanihoe
sa pagkatueog it adlaw,
mauli ka iya,
ups eon.
***
BAKUG
Nangin malipaton
ka eon Tay
sa pagsueod mo
kay Ninoy
sa ing buesa.
pero
euso-eusoha baea
nga ro mga isda
nga ngakiaykiay
sa likod ku
ing pabrika't
sabong pang-eaba
hay mga
bakug.
***
RO HARU
Ro rosa nga tinday
nagharu sa asul nga karnero
ag do ulihi hay
naduea...pagkatapos,
do rosa nga tinday
hay ginharuan it
itom nga kanding,
ag do nahauna hay nadua,
samtang do ueo it
dragon hay nagtago ku
anang kaeayo.
nagtaliwan do oras
it mga kabog, bampira, aswang
ag mueto.
ro itom nga kanding
hay ginharuan it
rosa nga tinday;
ag do nahauna hay naduea
pagkatapos do
asul nga karneo hay
nagharu sa rosa nga tinday
ag do ulihi hay naduea,
samtang do ueo it
dragon hay nagpaguwa
it anang kaeayo!
***
AGI MAN LANG
Si Jun gabasa
It mga dahon nga puea,
"Juan, basi maglimad ing mata."
"Owa ron 'nay, agi man lang ra."
Nagtikang ro adlaw
Pero ay Juan nga mata
Nagdukot gihapon
Sa mga dahon nga puea
Nag-abo pa...
"Ay, Juan, basi maglimad ing mata"
"Owa ron 'nay, agi man lang ra."
Nag-eupad do oras.
Si Juan, nagpuea ra mata,
May bitbit nga saesaeeon
Nga may busoe nga daea.
"Juan, limad eot-a ring mata."
"Owa ron 'nay, agi man lang ra."
Naduea si Juan
Ag owa eon it balita kana...
Pagktapos it tatlong dag-on,
Hakita si Juan
Sa idaeom it taytay
Gintamnan it busoe
Ku mga berdeng umaeagi.
"Ay, Jan, agi pa baea ra?"
Si bitoy,
Manghud ni Juan
Nagsamit-samit sa pagbasa
Ku mga dahon nga puea.
"Ay bitoy, agwari ron
Ay magapuea ring mata."
"Owa ron'nay, agi man lang ra."
