AM I. ROSELO
RO BAEATYAGON NI BERTO
Kon ako pasugtan,
Umpisa sa presidente
Paubos sa mga gabaid
Ku paea ag tsok
Sa eskuylahan,
Hay obrahon kong libro.
Ginabuytan
Ginabukad
Ginatueok
Ginapueawan
Agud kon kupas
Do mga letra
Sa kada panig
Pagatinaon it itom
Ku akong dap-ong.
***
SA PAGPANAW IT SUPERBISOR
Ginasipit
it waeang ilukon
ku superbisor
do sangka supot
samtang ginatuhil-tuhil
ku anang totpik
sa tuong alima
ro hanangit
nga prayd tsiken ag litson
sa anang mga ngipon.
Ag nagatumbo-tumbo
sa anang buy-on
do mga garland
samtang imaw gatango-tango
sa among nagangirit nga prinsipal
Ag sa mga maistrang gatanga-tanga.
"Sir,
ayaw eang himadla
sa pagbalik iya."
***
RO SUEOGIRON
Kon umuean sa kagab-ihon
Ag sumilak pagkaagahon
Makita mo ro mga bituon
Gasidlak sa imong mga tanom.
