A Poem of Antonino F. Tolentino

Antonio F. Tolentino

Amat-Amat

Rong mga butkon nga matsa tue-an
Eon lang sa kaniwang dahil na-as-asan
Nagapilit gihapon magtik-eod
It arado sa kaeanasan

Para eang may ihapin sa tiyan
Nga priming nagabukae rong tinae
Dahil sa purgang kape, ultimong kasudlan
Matsa kaisip man magrebelde

Apang rong mga hari igto
sa Kongreso ag Baeay it Presidente
Nagahinaeakhak ag busog
Kaibahan rong mga manggarang negosyante

Nagakasadya sanda ag nagakilindatan
Dahil para sa masunod nga eleksiyon
May pundo eon man halin sa kaeugtaan

Samtang ro andang mga alipures ag ayam
Nagapaninggitan sa mga pobre
Nugay it reklamo, natural sa pagpangabuhi
Kung indi, sabton namon it eupok it kalibre

Apang sa tunga it andang kasadya
Rong nagapangbudlay ag nagatinguha
Nga ultimong mangunguma

Sa idaeom it kahaya it buean
Nagatipon it kaisog ag kabaskog
Nagaamat-amat it baktas sa kagueangan

Dahan-dahan nga magamartsa
Nga matsa guyom paagto sa kasiyudaran
Andang pagabawion kon ano ro andang kinabudlayan

Mas abo, mas makusog!
Mga maniswak nga alima, pagabugtu-on
Rong gapos it kamaea-maeahan!